Analiza që OVL-UÇK thotë se s'ekziston
OVL-UÇK thotë sot se kritikat ndaj ndryshimeve në Ligjin për Dhomat e Specializuara janë "të nxituara dhe të pabazuara", dhe se deri tani s'është bërë publike asnjë analizë ligjore kundër tyre. Por një orë më herët, drejtori i IKD-së, Ehat Miftaraj, kishte emërtuar bazën: neni 162 i Kushtetutës. BE-ja, Gjermania dhe LDK-ja kishin bërë të njëjtin pretendim ditë më parë. Katër ish-udhëheqësit e UÇK-së të dënuar nga Dhomat e Specializuara presin ulje të dënimit nga po këto ndryshime.